馬天尼斯報「搶飯碗」之仇
2025/06/08
今場仲會加映「鬥牛名帥內訌」，葡萄牙領隊馬天尼斯都係西班牙人，2年半之前，安歷基辭去西班牙帥位後，馬天尼斯一度屬於接任大熱，但最終由富安迪成為「鬥牛兵團」主帥，馬天尼斯今仗遇上呢位「宿敵」，正係報「搶飯碗」之仇最佳機會。
西班牙上屆世界盃16強出局，安歷基黯然下台，當時媒體舉行民意調查，近440萬球迷網上投票，有38%支持馬天尼斯接手領軍，排第1位，反觀富安迪只有11%支持，僅位居第4位，甚至少過賓尼迪斯（18%），最後西班牙足總仍然選擇富安迪擔任主帥，令唔少球迷為馬天尼斯感到不值。
富安迪已證明領軍能力
不過，富安迪以行動證明自己係最佳人選，率領西班牙連續奪得上屆歐國聯及歐國盃冠軍。葡萄牙由馬天尼斯執教之下，上年歐國盃8強止步，近期甚至傳出帥位不穩，可能被「寸王」摩連奴取代，所以今場惡鬥西班牙，對於馬天尼斯能否保住帥位，極之重要。