着波衫「投敵」維拉：走開啦！ 加拿祖冇人吼紅魔減價求售
2025/06/24
阿根廷新星阿歷真度加拿祖慘變過街老鼠？自從歐霸盃決賽同領隊魯賓艾摩廉反面後，加拿祖已被曼聯掛牌出售，近日有消息指呢位20歲翼鋒買家唔多，「紅魔鬼」將要被迫降價求售，而加拿祖周一疑似挑機，公然着住阿士東維拉波衫，唔單止曼迷炮轟，連維拉官方亦唔畀面回應：「走開啦！」
加拿祖同曼聯反面後，早前先後去過羅馬、東京度假，近日就去咗西班牙度假勝地伊維薩島，但佢周一喺個人社交網分享相片，其中一張就着住英超敵對球隊阿士東維拉波衫，呢件9號球衣係老友拉舒福特上季外借維拉嘅戰衣，唔少曼迷見到後非常反感，批評佢故意咁做係表明「唔想再着曼聯波衫」。
加拿祖呢個爭議貼文除咗引嚟曼迷炮轟外，唔少互動亦相當有趣，同樣被曼聯「掛牌」賣走嘅拉舒福特，亦留言「我嘅兄弟」加上心心emoji，支持加拿祖嘅行動，估唔到連阿士東維拉官方社交網亦回覆：「走開啦（Stay away）」，非常唔畀面。
要降價近半至4.2億
據英國傳媒報道，曼聯原本對加拿祖叫價7,000萬鎊（約7.3億港元），但係呢個價格就令唔少買家卻步，消息指曼聯打算「面對現實」，將叫價大幅降低至4,000萬鎊（約4.2億港元），傳聞拿玻里、艾納斯等球會都打佢主意，英超嘅車路士同阿仙奴亦密切注視情況，加拿祖就話優先選擇留喺英超比賽。