阿仙奴1億筍價簽洛加特
2025/06/27
阿仙奴嘅夏天組軍計劃開始行動，據報尋日同賓福特達成協議，用「超筍價」930萬鎊（約1億港元）收購佢哋隊長基斯甸洛加特，呢位丹麥中場亦已同意個人條件，完成體測後就會正式簽約。
據羅曼諾同Ornstein等權威記者報道，隨住同湯馬士柏迪續約告吹後，阿仙奴即鎖定收購洛加特，轉會費為930萬鎊，另有獎金條款最高增至1,500萬鎊，遠遠低於早前熱刺傳聞4,500萬鎊嘅收購價。
洛加特效力賓福特5年，以防守力強見稱，上季112次重奪球權，喺英超僅次於摩西斯卡些度。消息指阿迪達欽點收購洛加特，希望佢可以成為球隊更衣室領袖之一，31歲嘅洛加特如順利加盟，將成為隊中第2名超過30歲球員。