祖達離世撫平傷痛需時 利物浦推遲開操日
2025/07/08
葡萄牙球星迪亞高祖達上周四因車禍離世，利物浦為令全體職球員有更多時間平復哀痛心情，決定將開操日推遲到今日，首場季前熱身賽作客普雷斯頓亦面臨取消，賽事門票已停止售賣。
同普雷斯頓拍跳或取消
利物浦原本開操計劃，係部分唔使踢國際賽球員喺上周五歸隊，其餘球員就喺尋日報到，包括新兵科利安華迪斯同謝利美費林邦等等，但隨住祖達兄弟嘅不幸離世，計劃亦出現變卦。
由於大部分球員日前出席完祖達喪禮，領隊施洛決定畀佢哋更多時間平復，開操日推遲到今日，而原定下周日（13日）作客普雷斯頓嘅首場季前熱身亦面臨取消，要等球員返嚟之後，評估佢哋情緒再作決定。
利物浦官網嘅賣飛系統，已宣布暫停出售賽事門票，英冠球會普雷斯頓亦會尊重「紅軍」嘅意願。按利物浦嘅季前備戰安排，對完普雷斯頓之後，大軍將會進行亞洲之旅，首站就係喺香港啟德對戰AC米蘭，之後就飛去日本對橫濱水手。