曼迷滿意增兵取消示威行動
2025/08/14
曼聯今夏使咗超過2億鎊（約21億港元）收購3位前鋒馬菲奧斯根夏、麥比奧莫同班捷文施斯高，展現重建決心。「紅魔鬼」球迷亦都收貨，英國傳媒報道，球迷組織「1958」原本打算喺周日晚首輪英超主場對阿仙奴前夕，舉行嘅示威行動宣布取消。
拉爵掟21億買人暫時收貨
「1958」近年搞過多次反曼聯班主格拉沙家族嘅抗議活動，並計劃喺開鑼前，首次舉行針對新股東拉特克利夫嘅示威，抗議呢位英國富商入主球會後，採取裁員等措施削減開支，加上曼聯上季僅排聯賽第15位，亦惹起大量擁躉不滿。「1958」早前就進行民意調查，指2萬6千位會員之中，有63%認為要進行示威，要求「拉爵」承擔責任。
不過拉特克利夫今夏連接以高價簽入馬菲奧斯根夏、麥比奧莫及班捷文施斯高，夾埋使咗超過2億鎊，令球隊重燃復興希望。當施斯高正式來投後，「1958」態度軟化，宣布因為成員出現分歧，決定取消「仙魔大戰」前夕嘅示威行動。