C朗駕到！艾納斯強陣襲港
2025/08/15
艾納斯尋日到達香港，備戰8月19日至23日期間，喺香港大球場舉行嘅25至26球季沙超盃，葡萄牙巨星基斯坦奴朗拿度、祖奧菲歷斯及沙迪奧文尼等人悉數現身，備戰下周二鬥伊蒂哈德嘅準決賽。
下周二大戰賓施馬簡迪
艾納斯是次以強陣到港出戰沙超盃，今夏加盟嘅祖奧菲歷斯、恩尼高馬天尼斯及上周喺熱身賽，對里奧艾維大演帽子戲法嘅C朗亦有隨隊。大批球迷冒雨到艾納斯下榻酒店門外等候球員現身，當C朗走落隊巴時，現場氣氛更見高漲，更有球迷高呼「Ronaldo！」為偶像喝彩。
艾納斯將會喺8月19日於大球場出戰沙超盃準決賽，同擁有賓施馬及尼高路簡迪等星級球員嘅伊蒂哈德，爭入決賽，至於另一場準決賽，艾卡迪沙對吉達艾阿里就會喺20日開戰，兩戰嘅勝方，將會喺8月23日嘅決賽展開爭霸。