轉會財技車仔最識玩 曼聯齋買齋買衰過富咸
2025/08/28
夏季轉會窗即將關閉，有英國傳媒統計英超各隊今夏轉會支出及收入情況。喺Big 6中以車路士最識玩，幾乎達到收支平衡。反觀曼聯因為成堆死貨喺手賣唔出，今夏轉會交易中只能「齋買」，同富咸齊齊錄得「零收入」，但成績仲唔及呢間「窮球會」，認真冇眼睇。
呢個「英超轉會統計榜」只計算各隊帳面數字，並未計算經理人佣金同稅項，以及轉會分成條款等數字，當中支出最多就係利物浦，高達2.919億鎊（約30億港元），但就有1.885億鎊（約19.7億港元）收入，變相只係使咗10億左右，反而支出排第2嘅阿仙奴，豪擲2.526億鎊（約26億港元）嘅同時，收入只有690萬鎊（約7,200萬港元）。
至於支出榜排第3嘅車路士，就盡顯高超財技，佢哋今夏買人用咗2.401億鎊（約25.1億港元），但收入係2.267億鎊（約23.7億港元），實際花費約2億，仲贏埋世冠盃，真係唔到你唔服。
近年頻頻買「水貨」嘅曼聯，支出1.972億鎊（約20.6億港元），排英超第4，但收入方面係「0」，據報曼聯為求「發市」，正積極出售「炸彈小隊」，可惜只有拉舒福特成功外借巴塞隆拿，其餘幾人海倫、安東尼馬菲奧斯、查頓辛祖等，都正與買家談判中，估計曼聯要接受大幅減價先有機會成事。唯一好消息係中場明奈有意「跳船」，咁啱皇家馬德里同馬德里體育會都想接收，若果成事，曼聯就可迎嚟「零的突破」。
富咸使418萬排名高過紅魔
值得一提，排「支出榜」榜尾嘅富咸，今夏僅簽入一名後備門將，僅花40萬鎊（約418萬港元），韋利安同卡路士雲尼斯奧斯都係自由身離隊，所以同曼聯一樣並無轉會收入，不過佢哋開季2戰得2分，成績仲好過曼聯，相信紅魔鬼會方要加把勁先得嘞！