大解放！C朗馬古尼歐霸踢正選

【on.cc 東網 專訊】足球博彩神器，每日重心提供盡在《彩報》：http://win.on.cc/football/　

輸畀賓福特後被貶後備嘅曼聯王牌C朗同隊長哈利馬古尼，嚟緊歐霸盃對皇家蘇斯達將獲解禁，重回正選位置，至於近期有好表現嘅利辛度馬天尼斯、華拉尼等主力，將會休息。

英國《鏡報》爆料，領隊坦哈格將於歐霸盃進行輪換，幾位後備都會正選登場，最矚目自然係C朗，佢今季喺聯賽只曾一次正選上陣，但就以0比4大敗於賓福特腳下，至於哈利馬古尼退居後備之後，上仗對阿仙奴後備登場，但立即攞黃牌，呢位隊長終於喺歐霸盃回復正選身份。

另一獲正選機會嘅將會係C朗喺皇馬嘅舊拍擋卡斯米路，暫時佢上陣時間唔多，但歐洲賽經驗豐富，相信壓得住場。其餘位置亦會大幅輪換，域陀連迪路夫、勞基梳爾、費特、艾蘭加，仲有新加盟嘅安東尼馬菲奧斯，喺歐霸盃都會落場。

至於近期4連勝主力利辛度馬天尼斯、華拉尼、杜維爾馬拉西亞，坦哈格當咗佢哋係寶，歐霸盃將被收起，以免用殘。