貴人相助　蘭歷克有望執教拜仁

【on.cc 東網 專訊】由於沙比阿朗素極大機會留任利華古遜主帥多1季，一直有意聘請佢領軍嘅拜仁慕尼黑惟有考慮其他人選，接替將於今夏離隊嘅杜曹。根據德國媒體《踢球者》爆料，拜仁將前曼聯看守領隊蘭歷克列為新帥人選之一。

現年65歲嘅蘭歷克除咗本身係德國人及擁有德甲執教經驗之外，最重要係佢同拜仁體育總監基斯杜化科特有密切關係，兩人曾於薩爾斯堡合作過，非常欣賞對方。正所謂朝中有人好辦事，基斯杜化科特可能會推薦蘭歷克畀拜仁。

德國傳媒引述蘭歷克朋友消息，指呢位「足球教父」最大夢想就係執教拜仁，拜仁管理層亦對佢有好高評價，雙方有機會一拍即合。

蘭歷克2022年離開曼聯之後，成為奧地利國家隊主帥，並協助球隊打入今屆歐國盃決賽周，有可能等賽事結束之後，跳槽去拜仁慕尼黑。