棄腳用手　希古恩贏板式網球男雙冠軍

【on.cc 東網 專訊】阿根廷名將希古恩掛靴後轉玩其他運動，改打板式網球，打下打下，仲畀佢贏咗項雙打冠軍，雖然獎金只有300美元(約2,340港元)，但就滿足到佢嘅捧盃欲。

球員生涯踢過皇馬、祖記、A米同車仔等豪門嘅希古恩，2022年喺國際邁亞密結束球員生涯，掛靴後愛上板式網球，據說該項室內運動喺美國頗為流行，而希古恩棄腳用手一樣掂，日前夥拍委內瑞拉拍擋塔雷克參加邁阿密一場錦標賽，成功贏到男雙冠軍。

36歲嘅希古恩2022年離開國際邁亞密時，為球隊攻入29球11助攻，係隊史射手王，而喺佢離隊大半年後，佢嘅阿根廷隊友美斯先至加盟國際邁亞密，兩人錯過咗同隊機會，而佢喺邁亞密嘅入球紀錄，就留畀美斯去打破。