奧拿拿賽後遇持槍打劫　執番條命

【on.cc 東網 專訊】同曼聯門將奧拿拿撞名嘅馬賽中場桑奧拿拿，周一凌晨(20日)踢完法甲作客勒哈弗爾後，準備駕車返回馬賽期間遇到賊人持槍搶劫，當時同行仲有隊友莫恩巴拿，不過賊人事敗逃去，而最好彩係兩名球員都冇受傷。

《Europe 1》報道，事發於比賽後，兩人如常去停車場攞車，但喺回程途中遭受攻擊；當時賊人持槍搶劫，車身上更有多個子彈痕迹，不過賊人最終事敗，並逃去無縱。

24歲嘅桑奧拿拿，同奧拿拿一樣都係喀麥隆國家隊成員，司職防守中場，案發當日佢喺89分鐘後備上陣；至於莫恩巴拿係奧巴美揚嘅前鋒拍擋，當日佢正選上陣，71分鐘退下火線，而馬賽當日作客贏2比1。