英格蘭初選名單　拉舒福特落選

【on.cc 東網 專訊】英格蘭周二(21日)公布歐國盃初選名單，多達33名球員，不過今季大跌watt嘅曼聯前鋒拉舒福特，照樣落選，反而水晶宮19歲小將阿當禾頓同查洛爾昆沙首次入選，利物浦中場居迪斯鍾斯亦成功上榜。

同拉舒福特一齊落選嘅，仲有兩位老臣子史達寧同佐敦軒達臣，但都唔及福仔咁「實至名歸」，事關呢位曼聯前鋒今季表現可謂災難級，曼聯出佢等同踢少個，又唔肯自我反省，反而不時同球迷罵戰，修夫基放棄佢相當正路。

至於史達寧同佐敦軒達臣可算係同修夫基共同經歷過一個時代，兩人落選標誌住英格蘭開始換班，不過同屬修夫基「契仔」嘅勞基梳爾，就算有傷仍然入圍。

三獅兵團6月初有兩場熱身賽，將會對波斯尼亞同冰島，然後會喺6月7日決選26人名單。英格蘭今屆歐國盃編入C組，對手有丹麥、塞爾維亞同斯洛文尼亞。