曼聯想簽韋斯咸硬漢　頂替卡斯米路

【on.cc 東網 專訊】曼聯中場卡斯米路好大機會今夏離隊，根據「轉會權威」記者羅曼諾(Fabrizio Romano)爆料，紅魔鬼已經有替代人選，就係韋斯咸中場艾臣奧馬艾華利斯，準備出手將呢位26歲墨西哥國腳收歸旗下。

卡斯米路上季表現嚴重走樣，一般相信會被曼聯出售，盛傳沙特阿拉伯豪門艾納斯有意接貨。羅曼諾指紅魔鬼內部討論之後，有意簽入艾臣奧馬艾華利斯填補空缺，因為領隊坦哈格非常欣賞昔日阿積士舊部。

艾臣奧馬艾華利斯曾於2019至23年效力阿積士，同當時教練坦哈格合作過，坦哈格早於1年前已經想簽入佢，但呢位墨西哥國家隊隊長最後選擇加盟韋斯咸，上季各項賽事上陣42場入2球。

艾臣奧馬艾華利斯上年夏天加盟韋斯咸嘅轉會費為3,500萬鎊(約3.47億港元)，估計曼聯起碼要出5,000萬鎊(約4.96億港元)，先至有機會令「錘仔幫」放人。