咁突然？艾達臣準備加盟艾納斯做C朗隊友

【on.cc 東網 專訊】英超冠軍曼城新一季面臨失去正選門將，根據「轉會權威」記者羅曼諾(Fabrizio Romano)爆料，「藍月亮」鋼門艾達臣摩拉斯獲得沙特阿拉伯球會開出重金利誘，有可能今夏離隊。沙特記者Ali Alabdallh指想簽入呢位巴西國腳嘅球會係艾納斯，意味艾達臣摩拉斯下季有望同C朗做隊友。

據悉艾納斯向艾達臣摩拉斯開出一份總值6,000萬歐元(約5億港元)薪酬嘅2年合約，令佢難以拒絕，盛傳雙方已經初步達成加盟協議，估計艾納斯將會向曼城支付3,500萬歐元(約2.9億港元)轉會費。

即將31歲嘅艾達臣摩拉斯2017年夏天由賓菲加加盟曼城，協助球隊奪得6次英超、1次歐聯冠軍等多項錦標，一直屬於曼城必然正選，如果佢離隊，對於「藍月亮」防線打擊甚大。

曼城上月同後備門將史堤芬奧迪加續約至2026年夏天，可能係為艾達臣摩拉斯離隊做準備。