曼聯簽迪歷特受阻　改斟德國硬漢

【on.cc 東網 專訊】盛傳曼聯計劃收購拜仁慕尼黑中堅馬菲斯迪歷特，呢位荷蘭國腳亦願意成「魔」，但由於拜仁球迷強烈反對出售迪歷特，令交易可能告吹。根據英國各大傳媒爆料，紅魔鬼準備轉移目標，改為簽利華古遜中堅莊拿芬泰希。

早前有超過6萬名拜仁球迷聯署要求會方留住馬菲斯迪歷特，令拜仁管理層好難做，最新消息指呢支德甲勁旅可能用加價手段，令曼聯知難而退，由原本要求5,000萬歐元轉會費，提升至6,000萬歐元(約5.1億港元)。紅魔鬼唔想再做「水魚」，已制定「B計劃」，準備出手收購利華古遜28歲中堅莊拿芬泰希，作為替代方案。

身高1米95嘅莊拿芬泰希制空力強，上季為利華古遜各項賽事上陣48場，防守穩陣之餘，仲有6球進帳，屬於球隊奪得德甲及德國盃冠軍嘅功臣，亦有份為德國出戰今屆歐國盃。

據悉拜仁慕尼黑都有興趣收購莊拿芬泰希，曼聯今次出手「截胡」，似乎想報復拜仁拒放馬菲斯迪歷特。