阿仙奴激鬥利華古遜 半場做大騷
2024/08/07
【on.cc 東網 專訊】英超勁旅阿仙奴備戰積極,日前完成美國之旅後,周四(8日)凌晨再踢熱身賽,主場迎戰德甲冠軍利華古遜。兩軍主帥阿迪達同沙比阿朗素都係新世代頂尖教頭,兩位西班牙少帥情同手足,亦擁有近似嘅進攻足球理念,今仗交鋒必定攻得燦爛,預計半場會多波入。(周四凌晨1時開賽)
阿仙奴季前熱身賽連場硬仗,美國之旅3場比賽勝和負各一,戰果都係其次,最重要係球員狀態已經操起,大軍返到倫敦做最後準備,相信態度會更加認真,而布卡約沙卡、迪格蘭賴斯、威廉沙列巴等主力歸隊,新加盟嘅守將卡拉科利亦有望首度亮相,決心有保證。
「兵工廠」進攻火力充足,加比爾捷西斯、加比爾馬天尼利同夏維斯等前鋒都喺熱身賽開齋,而且阿迪達戰術上偏向早段施壓,近5場熱身賽,有4場半場總入球開2球或以上,相信今仗喺主場出擊,一開波即會搶攻。
利華古遜季前操練時間比阿仙奴短,球員嘅狀態未必咁理想,不過主攻係佢哋戰術重點,上場熱身賽2比2和朗斯,今仗將會倒戈嘅格列沙加,以及科利安華迪斯、邦尼菲斯等攻擊球員都有上陣,駁火味道甚濃,隨時半場就上演入球騷。
更多賠率:
https://bet.hkjc.com/football/odds/odds_allodds.aspx?lang=CH&tmatchid=50032236&tournid=50031230