坦哈格若下台　曼聯將再斟杜曹

【on.cc 東網 專訊】曼聯日前只能驚險逼和波圖，歐霸盃仲未開齋，而且連續4場不勝，嚟緊英超對阿士東維拉都好危，據報坦哈格可能在10月國際賽檔期被炒魷，到時曼聯高層就會重啟杜曹談判。

曼聯今夏經歷換帥討論，而且曾經同德國籍領隊杜曹進行談判，但因為待遇同教練權力問題傾唔成，後來先宣布留用坦哈格，可以話坦哈格只係次選方案。

今季係坦哈格執教曼聯第3季，佢成日強調自己2年捧2盃，但今季表現實在慘不忍睹，坦哈格已經多次打破最差紀錄，而且又一次證明其今夏新簽嘅另一位阿積士嫡系馬菲斯迪歷特係水貨，英國傳媒估計，坦哈格最有可能在輸畀維拉後被辭退。

一旦坦哈格被炒，曼聯將無可避免地再度跌入換帥循環，高層心目中有唔少新帥人選，杜曹係最接近接手之人，其餘仲有助教雲尼斯達萊坐正、前英格蘭主帥修夫基，以及前車路士領隊樸達等。