基亞利殊曼城生涯玩完　或轉戰德甲追隨坦哈格

【on.cc 東網 專訊】英超「1億鎊先生」基亞利殊嘅曼城生涯進入倒數，根據英國《太陽報》爆料，呢位29歲英格蘭球星已經「認命」接受離隊，並獲得多支球隊垂青，最新消息指德甲勁旅利華古遜加入爭奪，新教練坦哈格希望簽入基亞利殊，接替好大機會轉投利物浦嘅科利安華迪斯。

基亞利殊4年前以1億鎊(約10.6億港元)轉會費由阿士東維拉加盟曼城，但一直踢唔出應有身價，今季更加因傷經常缺陣，各項賽事32次披甲僅入3球及5次助攻，已淪為後備，近日更被排除出世冠盃大軍名單，無緣參加呢項大賽，可見領隊哥迪奧拿已經放棄呢位「英超柏豪」。

英國《太陽報》指熱刺，紐卡素、阿士東維拉都有興趣簽入基亞利殊，利華古遜現時亦出手搶人，皆因利華古遜新帥坦哈格之前執教曼聯期間，已經好留意基亞利殊表現，非常認可佢嘅能力，希望同佢合作。據悉曼城將基亞利殊標價為4,000萬鎊，意味比買入價勁蝕60%，可見會方急於「出貨」，利華古遜正好乘虛而入。

由於利物浦計劃以1.1億鎊收購科利安華迪斯，呢位22歲德國國腳亦渴望加盟紅軍，利華古遜要留住佢，並唔容易，一旦高價出售，坦哈格就可以用呢筆巨額轉會費簽入心儀球員，除咗基亞利殊，呢位荷蘭名帥仲想收購2位前「紅魔鬼」愛將安東尼馬菲奧斯、阿歷真度加拿祖，如果成事，3人應該可以抵消科利安華迪斯離隊嘅影響。

另外，曼城正式宣布簽入狼隊左後衞艾洛利，雙方將簽約至2030年，同時簽入車路士後備門將比迪尼利，填補第3門將卡臣離隊後嘅位置。加上里昂中場卓基、AC米蘭中場雷恩達斯即將入「城」，「藍月亮」組軍大致完成，準備迎戰世冠盃。