Football

英格蘭撲飛去巴西

2013/10/15

三箭齊發喪攻波蘭

世界盃外圍賽歐洲區今晚上演最後一輪賽事,9組入面A至E組首名已塵埃落定,餘下4組F至I組要踢埋今輪先知邊隊可以直接出線巴西決賽周。大家好關心嘅「三獅兵團」英格蘭喺H組主場迎戰波蘭,英格蘭贏埋呢場就可以直接出線,球員爭勝決心超強,相反波蘭已鐵定出局,球員無心戀戰,頂唔住英格蘭三大箭頭朗尼、史杜列治同韋碧克,捧讓球主勝。

(now 621周三凌晨3時直播)

睇番H組目前形勢,榜首英格蘭有十九分,僅多次席嘅烏克蘭一分,而且烏克蘭今場只係對「超級魚腩」聖馬力諾,幾乎贏硬,所以唔使旨意英格蘭能夠靠烏克蘭失分而出線,英格蘭呢場係非勝不可,否則就要踢附加賽,隊長謝拉特喺上場贏咗黑山之後都提醒隊友出線任務仲未完成,球隊上下都唔可以掉以輕心,可知依家隊波戰意鮮明,就算領先緊都會繼續進攻,費事留有後患。

鶴臣Keep住炒黑山陣式

「三獅兵團」主帥鶴臣戰術一向保守,但喺爭出線嘅緊要關頭,佢都肯大踢進攻足球,上場對黑山就大膽派出三箭頭,又博一博出新兵安祖斯唐辛,結果效果出奇地好,攻力有所提升,朗尼同史杜列治各入一球,韋碧克又搞到對手擺烏龍,而小將安祖斯唐辛更犀利,除間接助攻朗尼入波外,更遠射得手,被媒體選為最佳球員。

英格蘭最尾大炒黑山4比1,士氣大振,鶴臣變陣成功,相信今場主場對住冇鬥志嘅波蘭,除咗用菲爾鍾斯替停賽嘅基爾獲加踢右閘外,陣容都唔會有乜大變動,Keep住呢個陣容攻力有一定保證,博讓球主勝。

波經所提供之資訊概以較新版本為準,並已力求精確可靠,但不保證絕對無誤。
資料只供參考用途,如有錯漏而導致閣下蒙受損失,本公司概不負責。