輸畀紐卡素當減壓 韋斯咸劫富濟貧鋤曼城
2016/01/23
文:樂比堅尼
天氣轉涼，對一眾捱夜睇波嘅朋友確實係一種考驗，所以太夜開波樂比寧願割愛，最多頂埋英超尾場韋斯咸主場對曼城。韋斯咸今季可以話係傳統強隊剋星，先後擊敗曼城、阿仙奴、利物浦、車路士、打和曼聯，今晚主場對曼城受讓半一，下盤值得捧場。
（now 621周日凌晨1:30直播）
韋斯咸上周以1:2不敵紐卡素，9場不敗告終，但對呢啲中型班球隊嚟講，卻起到減壓作用，畢竟球隊目前排第6位已遠超預期，領隊比歷擅長激勵士氣，並且以弱制強，今季每次「打大佬」都有超水準演出，當中包括首循環作客2:1擊敗曼城，今場定必重施故技。
曼城今季作客表現不穩，各項賽事已輸過5場，淨係計聯賽亦僅得4成勝率，有人話係因為缺少咗隊長高柏尼呢位定海神針，迪米捷利斯同奧達文迪呢個中堅組合唔係話曳，不過壓場感始終差啲。曼城對上1次聯賽連勝已經係去年10月，之後贏波大多「單跳」，所以千祈咪以為上場大勝水晶宮4:0就係復甦！
保頓財困無心戀戰 撐米爾頓凱恩斯
另一場由好友英冠專家法比嘉輝提供，夜晚11點開波保頓主場對米爾頓凱恩斯。保頓今季衰到貼地，聯賽僅贏2場排包尾，相信降班都無可避免，隊波搞成咁，主要都係莫財，之前幾個月已經有拖糧情況出現，據聞1月亦未必可如期出糧。
依家保頓有能力嘅球員都忙於搵出路，响轉會窗關閉前走人，前鋒艾美奧比踢埋今場就離隊，而部分球員踢來亦心不在焉，故保頓呢幾場表現特別差，連輸3仗兼失8球。除變賣球員外，保頓亦打算變賣球會資產，希望可盡快出售球會停車場甚至訓練場，籌錢出糧畀球員，响呢個環境下球員都好難專心踢波，一於捧米爾頓凱恩斯讓球勝。