兵工廠勝在鬥志十足
2024/04/28
文:謝德謙
熱刺主場迎戰阿仙奴上演「北倫敦打吡」，熱刺為保前4出戰歐聯勢必豁出去，而「兵工廠」為爭冠每場不容有失，雙方各有所求，勢必上演一場龍爭虎鬥。
防線多甩漏普帥頭痕
熱刺上場作客以0比4不敵紐卡素，由孫興民、迪姆華拿、占士麥迪臣及比蘭莊臣組成嘅鋒線竟然食白果。球隊最近5場比賽場場失波，防線犯錯頻頻，左閘烏杜治喺操練期間受傷需接受手術，今季無法上陣，相信主帥普斯迪高路於攻守表現都要動吓腦筋，估計今場熱刺都係以防守反擊去威脅「兵工廠」大門。
阿仙奴上仗以5比0輕鬆擊敗車路士，憑大勇嘅翼鋒李安度杜沙特先開紀錄，箭頭夏維斯及右閘賓韋特同樣梅開二度，賽後主帥阿迪達大讚一眾球員體能狀況良好。球隊喺季尾階段，鬥志往往決定一切，以「兵工廠」目標明確情況下，加上近7戰聯賽作客不敗，最近6輪作客更保持清白之身，估計今場可以反客為主，3分手到拿來。