爭前5冇保留入波唔會少
2025/05/11
文:謝德謙
今晚紐卡素主場惡鬥車路士，兩軍實力相當接近，聯賽排名亦只差1位，加上後面仲有森林同維拉虎視眈眈，兩隊為力保前5席位直接出戰歐聯，必定毫無保留。
伊沙克腳風順繼續數胡
紐卡素上場憑首席射手阿歷山大伊沙克臨完場前射入12碼，作客驚險逼和白禮頓，保住1分，主帥艾迪侯域必趁主場優勢大踢進攻足球。伊沙克聯賽已經攻入23球，相信今場不乏數胡機會。「喜鵲」今季主場成績理想，除伊沙克外，哈維班尼斯、積及梅菲甚至辛度東拿利都有入波能力，有望喺「車仔」防線搵到着數。
「車仔」各項賽事豪取5連勝，包括上周聯賽以3比1擊敗新科英超盟主利物浦，啱啱歐協聯次回合再以1比0小勝佐加頓斯殺入決賽，主帥馬利斯卡當然想乘勝追擊。不過球隊近年作客聖占士球場成績麻麻，惟有寄望剛打破入球荒既高爾彭馬繼續神勇。以兩軍火熱近況，估計出現入球騷機會唔細。