費南迪斯炒車「波子」重創　人冇事照鬥紅軍

足球博彩神器，每日重心提供盡在《彩報》：http://win.on.cc/football/　

曼聯周三(20日)凌晨作客利物浦嘅「雙紅會」前，中場般奴費南迪斯發生恐怖車禍，佢揸車去練習途中同另一部車迎頭相撞，呢位葡萄牙國腳部「波子」右邊車頭嚴重損毀，好在般奴費南迪斯喺意外中並冇受傷，照常練習備戰對利物浦大戰。

交通意外發生喺周二(19日)，當時般奴費南迪斯去緊卡寧頓訓練基地，畫面所見涉事兩部車都停喺狹窄路中心，般奴費南迪斯就喺車外查探佢部價值9.4萬鎊保時捷嘅損毀情況，而且一臉無奈。般奴費南迪斯之後亦如常去練習，離開嗰陣就要「黐車」由桑馬達載走。

曼聯領隊蘭歷克表示，般奴費南迪斯並無受傷：「意外發生喺般奴費南迪斯嚟練習途中，以我所知冇人受傷，佢亦有跟隊操練，般奴費南迪斯依家OK，對利物浦場聯賽都OK。」般奴費南迪斯早前同曼聯續約5年，周薪增加至24萬鎊。