兵工廠效應　艾美利回歸首戰率維拉破曼聯

最強博彩盤路過關神器《串績王》：http://win.on.cc/football/　

阿仙奴今季銳不可當，呢股「兵工廠效應」延續至前領隊艾美利身上，呢位西班牙名帥日前回歸英超執教阿士東維拉，並於周日(6日)晚首度領軍出擊，主場以3比1擊敗曼聯，成為英超史上第4位帶領新球隊首場，立即贏紅魔鬼嘅主帥。

艾美利回歸英超第一擊，球員都非常落力，開賽僅11分鐘已經領先2球，先係積及藍斯直傳畀里安拜尼射入，跟住左後衞盧卡斯迪治尼主射罰球入網。

踢到臨完上半場，曼聯左閘勞基梳爾遠射，省中積及藍斯入網，官方計呢位維拉21歲小將擺烏龍。

換邊後僅4分鐘，積及藍斯將功補過勁射入網，幫維拉領先至3比1，佢亦成為英超史上第4位單場比賽有入波、助攻及擺烏龍嘅球員。值得一提，另外3位都係名將，包括加里夫巴利、朗尼、奇雲戴維斯，睇來積及藍斯有潛力成為球星。

至於艾美利取得夢幻開局，佢繼2021年5月歐霸盃決賽，率領維拉利爾憑互射12碼擊敗曼聯，奪得冠軍之後，再次力挫對手，成為紅魔鬼剋星。