愈鬧愈紅！C朗IG粉絲突破5億世上第一

陳瀅Kylie C陪你喺《彩報》玩轉世盃：https://win.on.cc/football/　

C朗因為公開數臭曼聯，面臨被解約，亦遭到唔少球迷批評冇品，但仍然無損呢位37歲葡萄牙國腳嘅魅力，近日佢嘅社交網Instagram「粉絲」數目突破5億大關，成為史上首位擁有5億IG追隨者嘅個人帳戶。

C朗成為首位IG「5億先生」，唔止證明佢人氣高企，仍然大受球迷歡迎，而且背後亦蘊藏龐大經濟利益。據悉C朗一個IG廣告貼文收入高達230萬美元，相信「粉絲」數目突破5億之後，佢可以再加價。

除咗IG之外，C朗喺Twitter亦有1.05億「粉絲」，Facebook上亦有1.54億「粉絲」。

C朗好大機會明年1月轉會市場重開之後離開曼聯，雖然各主要大球會認為佢狀態大不如前，無意簽入佢，但如果考慮埋IG影響力，賣波衫等商業價值，相信仍然有唔少球會有興趣邀請C朗加盟。