粉絲餓波　漢堡明年首仗主場賣逾4萬6張飛

德乙喺明年1月28日凌晨重開，雖然依家處於歇冬期，但老牌勁旅漢堡於2022年結束前收到好消息，提早預售畀粉絲明年1月尾首仗聯賽主場迎戰布倫瑞克嘅波飛，依家已經賣出超過46000張，而漢堡主場可容納5萬多人，可見粉絲非常餓波，期待聯賽重開。

事實上，漢堡近年於德乙浮浮沉沉，直至上季殺入附加賽僅負而無緣升班，令球隊上下重燃希望，今季17仗聯賽錄11勝1和5負，現居次席，箭頭基列素更以11球位居射手榜榜首，中場拿斯路賓尼斯更屢有助攻，球隊士氣高昂，目標劍指頭2名嘅直接升班資格，見到粉絲咁熱情支持球隊，一定會大打爭氣波。