簡斯路首演有料　拜仁大勝闖德盃8強

足球博彩神器，每日重心提供盡在《彩報》：http://win.on.cc/football/　

周四(2日)凌晨德盃16強賽事，大熱門拜仁慕尼黑作客4比0大炒緬恩斯，新鮮由曼城加盟嘅祖奧簡斯路即刻擔正，出任右翼衞嘅佢交出助攻，表現獲教練拿高斯文大讚。

歇冬後3場不勝嘅拜仁今仗強陣出擊，祖奧簡斯路處子戰迅速入局，17分鐘右路突破後傳中畀祖普莫亭頂入，揭開大勝序幕，穆斯亞拿同利萊辛尼之後接連建功，半場拜仁領先3比0。換邊後拜仁放軟手腳，艾方素戴維斯83分鐘錦上添花，輕鬆贏4比0晉級。

拜仁教練拿高斯文對新兵祖奧簡斯路非常滿意：「佢踢得好好，好有創造力，完成好多美妙傳球同傳中，佢之後跟世界最佳教練(哥迪奧拿)踢波，我要做嘅事就係叫佢盡量表現自己。」