曼聯賣盤首階段將結束　5大財團提出收購

最強博彩盤路過關神器《串績王》：http://win.on.cc/football/　

英超勁旅曼聯宣布計劃賣盤後，首階段程序將會喺下周五(17日)結束，英國《每日郵報》報道，一共有5間財團已表達收購意向，當中包括卡塔爾、美國、沙特阿拉伯財團，以及英國首富拉特克利夫等，勢必掀起一場激烈「紅魔收購戰」。

曼聯班主格拉沙家族上年11月決定賣盤，並委託投資銀行同顧問機構進行，下周五完結嘅首階段程序，會接受有意收購財團提出申請，下一階段就會畀競標者查閱曼聯嘅私密帳目。《每日郵報》指目前有5個財團提出收購，戰況激烈。

除早前報道嘅卡塔爾私人財團之外，2間來自沙特阿拉伯嘅財團都有意收購，亦有一間來自美國嘅財團競逐，而一直高調行事嘅英國首富拉特克利夫，據報亦搵到美國銀行集團摩根大通以及美國投資公司高盛集團支持收購計劃，實力足以同一眾中東富豪抗衡。