安素法迪計劃離開巴塞　經理人密斟阿仙奴

最強博彩盤路過關神器《串績王》：http://win.on.cc/football/　

冬季轉會窗完結冇耐，英超「1哥」阿仙奴已為夏季組軍做準備，據西班牙傳媒報道，「兵工廠」正同巴塞隆拿新星安素法迪經理人密斟，希望將呢位天才帶去酋長球場，不過巴塞隆拿教練沙維就唔想割愛，阿仙奴買人隨時要出動天文數字。

西班牙媒體《Cadena Cop》報道，安素法迪今季未獲巴塞隆拿重用，大部份時間都係以後備身上陣，呢位20歲新星已萌生去意，佢嘅「金牌經理人」佐治文迪斯亦同多間球會接洽，其中英超嘅阿仙奴反應最踴躍，佢哋1月出1億歐元收購梅迪歷失敗，最後改簽比利時翼鋒李安度杜沙特，仍有大筆資金可以再簽一個星級攻擊球員。

安素法迪近2季因嚴重傷患影響發展，今季復出後未獲教練沙維重用，各項賽事只係踢過9場正選，不過沙維早前表示，安素法迪需要時間成長，對佢未來仍然充滿信心，所以唔會輕易割愛。安素法迪合約內有10億歐元買斷條款，但佐治文迪斯正策動呢位小將離隊，消息指曼聯亦係潛在買家之一。