曼聯換老闆大把錢使　今夏買美臣蒙特

最強博彩盤路過關神器《串績王》：http://win.on.cc/football/　

曼聯好大機會賣盤，新老闆仲好可能係財大氣粗嘅卡塔爾財團，預料交易完成後，紅魔鬼將於今夏大灑金錢增兵，英國《太陽報》指曼聯加入爭奪車路士中場美臣蒙特，準備開出天價薪酬利誘呢位英格蘭國腳加盟。

現年24歲嘅美臣蒙特只剩下一年半合約，車路士會方希望同佢續約，但美臣蒙特要求大幅加薪，由現時8萬鎊周薪，增加至24萬鎊，同史達寧等新加盟球員睇齊，令雙方談判陷入僵局。

英國傳媒認為，可能美臣蒙特及其經理人睇中車路士新班主保利「揮金如土」嘅性格，想趁機爭取一份肥約。

不過，車路士簽入多位新兵後，出現人滿之患，令美臣蒙特重要性下降，加上佢今季英超上陣21次僅入3球及2次助攻，表現令人失望，管理層會否滿足佢嘅人工要求，成為疑問。

據悉利物浦、曼城、祖雲達斯都有興趣簽入美臣蒙特，依家曼聯亦加入爭奪，只要球會完成易主，到時有大水喉射住，相信要向美臣蒙特提供一份24萬鎊周薪合約，應該冇難度。