麥總宣布留效PSG　想踢埋奧運

足球博彩神器，每日重心提供盡在《彩報》：http://win.on.cc/football/　

基利安麥巴比日前宣布繼續留效巴黎聖日耳門(PSG)，最大目標係協助球隊贏得歐聯冠軍，仲話參加奧運係佢夢想，2024巴黎奧運可能見到佢。

去年突然轉軚拒絕皇馬、續約PSG後，麥巴比被球迷戲稱為「麥總」，不過佢同會方合約只係簽2+1，明年約滿後可自行決定去留，令佢動向再添變數，直至《France 3》日前一個訪問，麥巴比親自宣布留隊決定。

麥巴比表示：「我下一步係贏歐聯冠軍，我哋已經試過打入決賽、4強、8強、16強，除咗捧盃之外都經歷過，我希望盡快實現捧盃。喺邊度？在巴黎聖日耳門，我係巴黎人，仲有合約，所以喺巴黎。」

「麥總」留喺巴黎仲有另一目標，就係參加奧運：「參加奧運會係我嘅夢想，尤其奧運會喺巴黎舉行，不過呢件事並唔係我一個人決定，仲要同球會、國家隊討論，奧運會之前有歐國盃，都要考慮，我亦唔會強逼自己參加奧運。」