巴塞陷3場入球荒　馬體會6連勝後上爭標？

最強博彩盤路過關神器《串績王》：http://win.on.cc/football/　

周一(17日)凌晨西甲賽事，「1哥」巴塞隆拿作客被基達菲悶和0比0，各項賽事陷入3場入球荒，雖然喺聯賽榜仍有11分嘅領先優勢，不過下星期大戰來勢洶洶嘅馬德里體育會，如果再有差遲，隨時令冠軍爭逐再起波瀾。

巴塞隆拿繼西盃吞皇馬4蛋後，近2場聯賽分別0比0悶和基羅納同基達菲，係球隊自1993年以來首次喺西甲單季連續2場0比0。巴塞隆拿進攻死火，下周日(23日)仲要迎戰強勢嘅馬德里體育會，馬體會周一主場2比1贏艾美利亞後西甲6連勝，近9場聯賽豪取8勝1和，如果下仗贏埋巴塞隆拿，就可以追到只差10分。

馬體會教練施蒙尼賽後被問到有冇機會後上封王，呢位阿根廷教頭就表示：「我哋唔好講啲不設實際嘅話題，現實係我哋落後榜首13分，依家要專注做好自己嘅事，積分會喺季尾顯示出嚟，結果係點大家拭目以待。」