曼聯創紀錄笑住收咧　坦哈格：傑出嘅球季！

最強博彩盤路過關神器《串績王》：http://win.on.cc/football/　

曼聯喺周日(28日)英超煞科戰，憑查頓辛祖同般奴費南迪斯入波，主場2比1擊敗富咸，以英超第3名成績衝線，今場勝仗係曼聯今季第27場主場勝仗，追平球會史上單季主場最多贏波紀錄，第1季執教嘅坦哈格賽後總結：「恭喜球員踢咗一個傑出嘅球季！」

曼聯今場只係爭第3位，但19分鐘就被富咸率先入波，7分鐘後卡斯米路再輸12碼，不過迪基亞神勇撲出阿歷山大米杜域嘅主罰，令曼聯得以大反撲，由查頓辛祖同般奴費南迪斯入波反勝2比1完場。完場後曼聯全隊齊齊慶祝迪基亞奪英超金手套獎，總算係笑住咁收咧。

首季執教嘅坦哈格賽後向奧脫福球迷致辭：「首先我要多謝所有球員，佢哋踢咗一個傑出嘅球季。多謝職員同所有球迷嘅支持同貢獻，雖然我話多謝，但其實我哋仲有1場比賽，我肯定球員會傾盡全力去打敗曼城，我亦相信我哋好有機會將英足盃冠軍帶番奧脫福！」