曼聯賣唔出馬古尼真相曝光　因為要求呢個價錢

最強博彩盤路過關神器《串績王》：http://win.on.cc/football/　

曼聯一直希望出售中堅哈利馬古尼，籌集資金收購新兵，但一直無人問津，原來係因為叫價太高，根據英國《曼徹斯特晚報》爆料，紅魔鬼要求5,000萬鎊(約5億港元)轉會費，令唔少潛在買家卻步。

曼聯2019年夏天以破中堅最高轉會費紀錄嘅8,000萬鎊(約8億港元)向李斯特城收購哈利馬古尼，但由於呢位英格蘭國腳表現每況愈下，加上已經30歲，估計現時身價只值2,000萬鎊(約2億港元)，如果曼聯以呢個價錢出售馬古尼，就真係蝕大本，仍然希望收番5,000萬鎊轉會費減少損失。

問題係環顧歐洲大球會根本唔需要馬古尼，至於中小型球會畀唔起5,000萬鎊轉會費，導致「有價冇市」。哈利馬古尼若然勉強留隊，恐怕會繼續長坐冷板，曼聯亦白白浪費薪酬支出，等於雙輸，紅魔鬼讓步減價出售可能係唯一解決方法。