尷尬！美職將艾比路亞當係布斯基斯

最強博彩盤路過關神器《串績王》：http://win.on.cc/football/　

美職近日風雲人物，當然係加盟國際邁亞密嘅阿根廷「球王」美斯，但其實同美斯一齊亮相嘅，仲有西班牙名將布斯基斯，可憐佢喺美斯嘅光芒之下，只能成為典禮嘅「活動佈景板」，就連美職官方twitter都搞錯，將另一位西班牙球員艾比路亞當做布斯基斯！

當所有球迷焦點放晒喺美斯身上，贏過世盃、歐國盃、歐聯(3次)同西甲(9次)嘅布斯基斯，加盟國際邁亞密後亦要做大配角。美職官方twitter介紹布斯基斯嘅輝煌成就嗰陣，竟然用咗一張艾比路亞錫世盃冠軍嘅相片，尷尬場面即時被網民指出錯處。

美職官方twitter被踢爆後打圓場，貼出布斯基斯錫世盃冠軍獎盃嘅相片同艾比路亞做對比，留言：「點解布斯基斯同艾比路亞喺呢度咁似樣？管理員要換過一副新眼鏡...」盛傳國際邁亞密即將簽入另一西班牙球星佐迪艾巴，有網民溫馨提示：「記得檢查下佐迪艾巴個預設帖有冇落錯相呀！」