馬體會執到寶　有望免費簽「真實版戴志偉」

最強博彩盤路過關神器《串績王》：http://win.on.cc/football/　

西甲勁旅馬德里體育會好大機會繼續將「新C朗」祖奧菲歷斯外借去其他球隊，前鋒艾華路莫拉達亦可能離隊，教練施蒙尼希望簽入進攻球員，保持鋒線力量，並睇中鎌田大地，有望免轉會費簽入呢位自由身嘅日本國腳。

即將27歲嘅鎌田大地已經同法蘭克福約滿，原本計劃轉投意甲勁旅AC米蘭，但卻談判失敗未能成事。根據西班牙《世界體育報》爆料，馬體會趁機斟介能夠勝任進攻中場及前鋒嘅鎌田大地，希望將佢打造為球隊進攻新核心。

鎌田大地2017年加盟法蘭克福，曾經被外借去比利時球隊聖圖爾登，佢4年前重返法蘭克福之後，表現愈來愈出色，並協助球隊奪得2021/22年球季歐霸盃冠軍。鎌田大地上季為法蘭克福上陣47次射入16球及6次助攻，被譽為「真實版戴志偉」，據悉另一支西甲球隊皇家蘇斯達都有意簽入鎌田大地，馬體會必須盡快開出合約，否則隨時被對手捷足先登。