曼聯仲未公布賀蘭特球衣號碼　真相原來係咁

曼聯上周六(5日)已經正式宣布簽入阿特蘭大射手賀蘭特，但一直未公布呢位20歲丹麥國腳嘅球衣號碼，令想印波衫冧巴嘅球迷好焦急。根據英國《太陽報》爆料，曼聯主帥坦哈格打算再簽入2至3位球員，同時亦要清洗部份副選，可能要等組軍完成，再決定賀蘭特嘅號碼。

據悉曼聯下一單收購好可能係費倫天拿中場蘇夫恩岩拉伯特，仲有尼斯中堅圖迪保，至於清洗球員人數就更加多，包括安東尼馬迪爾、費特、麥湯米尼、哈利馬古尼等。由於賀蘭特最喜愛17號，可能等現時17號球衣主人費特離隊後，再接過呢件波衫。

此外，安東尼馬迪爾着緊代表射手嘅9號，如果佢離隊，賀蘭特亦有機會着呢個號碼，由於賀蘭特有傷在身，將缺陣首2場英超，佢仲有時間，慢慢決定着邊個號碼。