【官宣】英格蘭金靴外流　阿積士簽英冠神射手

繼3屆英超金靴哈利卡尼加盟拜仁慕尼黑後，再有英格蘭金靴前鋒外流，上季英冠神射手艾卡邦，周四(17日)落實由米杜士堡轉投荷甲勁旅阿積士，轉會費總值1,220萬鎊(約1.22億港元)，並會着起阿積士嘅10號波衫。

27歲嘅艾卡邦上季效力米杜士堡，以28個入球成為英冠神射手，可惜米杜士堡喺升班附加賽出局，未能升上英超。落實加盟阿積士後，艾卡邦表示：「我感激米杜士堡上下對我嘅愛，上季嘅回憶令我非常光榮，依家我有一個新挑戰，阿積士係世上最佳球會之一，我急不及待為阿積士上陣。」

艾卡邦係阿仙奴青訓產品，不過之前一直做「人球」效力唔同球會，曾經去過比利時嘅聖圖爾登同希臘嘅PAOK，上季喺米杜士堡領隊卡域克執教後大爆發，為佢贏得加盟阿積士嘅機會。