三笘薰入「美斯式金球」　白禮頓首次穩坐英超榜首

白禮頓近年不斷出售主力，但無阻其神奇表現，喺周六(19日)晚作客以4比1大勝狼隊，日本國腳三笘薰球王上身，射入「美斯式金球」，仲有1次助攻，以呢位26歲翼鋒超卓表現，好大機會成為下一位登入豪門嘅白禮頓球員。

白禮頓今夏出售2位中場大將阿歷斯麥亞里士打、摩西斯卡些度，但對於球隊表現冇影響，繼上仗以4比1大勝盧頓之後，今場再以同樣比數擊敗狼隊，2戰2勝，淨得球比曼城多2球，加上水晶宮對阿仙奴要等到周二(22日)凌晨先至交鋒，令到白禮頓史上首次喺頂級聯賽穩坐榜首「過夜」。

白禮頓連場大勝，三笘薰居功厥偉，佢喺上場對盧頓，已貢獻1次助攻，今仗開波15分鐘，個人突破，擺脫4位狼隊球員夾擊，冷靜射入為球隊打開紀錄，踢到同美斯一樣咁款。

三笘薰下半場傳畀艾斯圖賓蘭入波，簡直係一人主宰整場賽事，難怪早前傳出曼城領隊哥迪奧拿有意簽入三笘薰。另外，白禮頓中場蘇利馬治梅開二度，一度領先4球，狼隊僅靠黃喜燦入波破蛋。