西班牙青春風暴　耶馬勢破加維紀錄

西班牙將於9月9日及13日凌晨出戰歐國盃外圍賽，分別鬥格魯吉亞、塞浦路斯，領隊富安迪徵召年僅16歲嘅巴塞隆拿前鋒耶馬入伍，如果佢上陣，就可以打破加維保持嘅西班牙史上最年輕披甲紀錄，以耶馬近期勇態，加上對手都係弱隊，相信富安迪會畀耶馬創造歷史。

巴塞隆拿中場加維2021年以17歲零62日首次為西班牙上陣，成為「鬥牛兵團」史上最年輕上陣球員，富安迪9月1日公布大軍名單，耶馬首次入選大國腳，當日佢只係16歲零50日，只要佢嚟緊對格魯吉亞或者塞浦路斯披甲，就可以打破加維嘅紀錄，並且推前近1歲，實在非常跨張。

耶馬可以晉身西班牙大國腳，甚至獲得上陣機會，並唔令人意外，因為佢今季已成為巴塞隆拿主力，近3場西甲都擔任正選，其中對維拉利爾，佢傳畀加維頂入，打破隊友安素法迪紀錄，成為踏入21世紀以來，西甲最年輕取得助攻嘅球員，16歲嘅耶馬同19歲嘅加維為巴塞及西班牙國家隊刮起一股青春風暴。