鹹魚翻生　莫拉達65場國際賽首次「戴帽」

西班牙喺歐國盃外圍賽A組作客以7比1狂勝格魯吉亞，除咗16歲新星耶馬入波創造歷史之外，30歲前鋒艾華路莫拉達亦寫下球員生涯新里程碑，65次為國家隊上陣，首嘗單場入3球「帽子戲法」滋味，呢位過往經常被批評浪費入波機會嘅「敗家仔」，終於威番1次。

根據ESPN統計，艾華路莫拉達踢球會賽事，曾經有2次「帽子戲法」，並且都係2017年創出，分別係為皇馬對雷加利斯，為車路士對史篤城。呢位現時效力馬德里體育會嘅射手自2014年晉身西班牙大國腳以來，直至今場先至喺國際賽「戴帽」，國家隊入波累積至33球，排球隊史上第5位，屬於現役入波最多嘅球員，但距離西班牙史上射手王大衞韋拿，仲差26球。

艾華路莫拉達今年3月獲西班牙新領隊富安迪委任為新隊長，當時惹起唔少爭議，呢位前鋒今仗以行動證明自己絕對夠資格戴上隊長臂章。