梅迪歷愈踢愈頹之謎　沉迷健身兼打機

烏克蘭新星梅迪歷原本被視為「未來金球獎」人選，不過1月加盟車路士後愈踢愈頹，上場歐國外為烏克蘭對英格蘭亦出晒醜，面對33歲嘅基爾獲加被Mark到一戙都冇。據《The Athletic》報道，梅迪歷沉淪最大原因，係佢太過沉迷做Gym同打機！

梅迪歷年初高價轉會車路士後，踢咗18場仲未入過波，被球迷稱為「世紀水貨」。《The Athletic》日前報道，梅迪歷訓練相當落力，一有時間就去做健身，而車路士教練團認為，梅迪歷因為「過度健身」而影響體型同踢法，甚至更加容易受傷，所以車路士已勒令佢減少去做Gym嘅時間。

另一個問題係，梅迪歷嚟到倫敦後因為人生路不熟，所以花咗好多時間去打機，除咗操練同做Gym之外，佢大部份時間都係同烏克蘭嘅朋友玩電腦射擊遊戲《CS:GO》，並唔主動去融入英國嘅生活，亦拉長佢嘅適應期。