洛迪叉頸領紅　10人曼城照贏森林

曼城周六晚(23日)早段領先兩球，雖有洛迪卡斯簡迪向對方「叉頸」領紅被逐，最終仍然以2比0擊敗諾定咸森林，英超6連勝繼續領先。

比較周中歐聯反勝貝爾格萊德紅星，曼城作出兩個調動，中場謝利美杜古取代貝拿度施華，再同菲爾科頓左右互調，左閘就有加華度爾登場，全力撲擊森林。

「藍月亮」開賽7分鐘就入波，基爾獲加右路回傳，菲爾科頓接應建功領先1比0，呢球波特別之處係曼城球員開波後攻足7分鐘，對方森林只有門將米高端納曾接觸皮球，幾近完美。

14分鐘曼城同樣右路攻勢，馬菲奧斯紐尼斯右路落底傳中，艾寧夏蘭特遠柱空晒頭槌破網，曼城輕鬆領先2比0，森林之後先開始有攻勢，其中基比斯韋特主射罰球，但省中人彈出。

下半場形勢有變，洛迪卡斯簡迪同基比斯韋特衝突，洛迪衰衝動向對方「叉頸」，結果被罰紅牌出場，曼城10人應戰再難控制戰局，同對方拉成均勢，可惜森林未能破蛋，最後曼城保持2比0勝局完場，主場20連勝。