曼城被「南韓仔」射爆　哥迪奧拿冇晒面

周六(30日)英超賽事，衞冕嘅曼城作客1比2輸畀狼隊，雖然仍以18分排喺榜首，但全勝走勢同不敗身都被打破。今場為狼隊射入致勝球嘅南韓前鋒黃喜燦，賽前被哥迪奧拿以「南韓仔」嚟形容，被指有欠尊重，呢個入波相信會令哥迪奧拿記得佢個大名。

曼城今場有洛迪卡斯簡迪停賽，哥迪奧拿亦累積黃牌唔能夠喺場邊指揮，開波13分鐘就有魯賓戴亞斯擺烏龍先落後，雖然祖利安艾華利斯58分鐘追平，但狼隊喺66分鐘就由黃喜燦禁區內連環射門得手，曼城最終輸1比2完場。

有趣嘅係，哥迪奧拿賽前點名讚狼隊嘅進攻球員話：「對狼隊好難打，睇下佢哋嘅前鋒，有柏度尼圖、馬菲奧斯根夏同嗰個南韓仔，佢哋都非常非常出色。」雖然哥迪奧拿係讚緊，但狼隊球迷覺得用「南韓仔」嚟形容黃喜燦係唔尊重，當黃喜燦入波後，狼隊官方社交網亦特別標注「南韓仔」，明寸哥迪奧拿。