派路教唔掂意乙　森多利亞未炒得佢住

今季降落意乙嘅森多利亞請咗派路執教，但球隊先被扣2分，頭8輪賽事僅得1勝2和5負，到依家只得3分，傳媒估計派路會喺10月國際賽前後被炒，但有消息指，由於會方財務安排，暫時無法解僱派路。

森多利亞今季真坎坷，由於財務違規被賽會扣2分，派路又教得曳，8輪過後只得3分排尾2位置，再咁落去隨時降落意丙，《Calciomercato.com》報道，如果下場未能擊敗阿斯科利，會方就會喺國際賽檔期易帥，並已有接替人選，會搵恩沙基或丹吉洛接手。

不過《全市場》報道指，森多利亞短期內無法換帥，主要原因係財務安排未完成，會方正同法院合作，爭取獲得債務重組計劃，換教練都要得到法院批准，因此派路暫時未能落鑊。