哥迪奧拿一語道破　曼城阿仙奴成功秘訣

阿仙奴同曼城將於周日(8日)晚11點30分交鋒，曼城主帥哥迪奧拿發表偉論，認為球會管理層唔應該以短期成績決定領隊去留，否則會錯過收成期，對手阿仙奴主帥阿迪達就係最佳例子，如果兵工廠當年一早炒咗阿迪達，就唔會有近2季出色表現。

阿迪達2019年12月接手執教阿仙奴，首2年成績欠佳，2021/22年季更加開季英超3連敗，幾乎被炒，幸好保住飯碗，兵工廠成績亦穩步上揚，該季獲得第5位，上季更加成為亞軍。

哥迪奧拿話：「當球會真正相信某件事會發生，並對領隊有耐性，就可以發揮作用，球會高層必須有遠見同計劃，而唔係根據短期結果做決定。阿仙奴現時已經有1位領軍多時嘅主帥阿迪達，佢非常了解同熱愛球會，冇人比佢更適合執教阿仙奴。」

哥迪奧拿一方面讚阿仙奴留住阿迪達嘅決定英明之外，似乎亦講緊自己嘅經歷，哥帥首季執教曼城，只係取得英超第3位，但曼城管理層一直非常信任佢，先至有「藍月王朝」出現，其他球會老闆學嘢啦。