麥湯米尼大翻身　冬窗唔使離隊

英國傳媒報道，曼聯中場麥湯米尼憑近期出色表現改寫命運，已被剔除出清洗名單，明年1月唔使離隊，並開始獲得坦哈格信任。

《鏡報》報道，麥湯米尼係今夏曼聯清洗名單其中一員，韋斯咸曾出價3,000萬鎊求購，但因為唔到價被曼聯拒絕，最終麥湯米尼留隊，不過被坦哈格投閒置散，今季僅上陣6場，只有2場踢正選，另有5場齋坐冷板冇出場。

曼聯簽入蘇夫恩岩拉伯特後，麥湯米尼上陣機會更加渺茫，一般估計明年1月肯定被出售，但一場波改變命運，聯賽對賓福特，麥湯米尼完場前3分鐘入替，補時梅開二度協助球隊反勝2比1，救番奧拿拿、坦哈格同成隊波。

其實麥湯米尼喺蘇格蘭國家隊一直有好表現，今年上陣7場入6球，報道指曼聯已對佢收回清洗決定，仲會提升出場順序，呢位曼聯青訓產品仲有兩年合約，另加一年自動延長，至少今年唔使擔心畀人踢走。