比寧咸又入波！皇馬被貝迪斯逼和

周六(9日)西甲賽事，皇家馬德里作客被貝迪斯逼和1比1，各項賽事5連勝走勢告終。今場為皇馬入波嘅又係英格蘭新星祖迪比寧咸，喺皇馬入球數已追平英格蘭名將奧雲紀錄(16球)，勢必超越碧咸為「銀河艦隊」入20球嘅英格蘭球員紀錄。

貝迪斯喺倒戈嘅艾斯高帶領下，今仗為皇馬構成唔少威脅，不過皇馬喺53分鐘由祖迪比寧咸精彩入楔，接應巴謙戴亞斯妙傳單刀射入，可惜貝迪斯66分鐘即將艾達雷布轟入世界波追平，最終兩隊各得1分。今場係祖迪比寧咸加盟皇馬後，18場比賽第16個入球，追平奧雲喺04/05球季效力皇馬嘅入球數(45場入16球)，喺皇馬史上入波最多嘅英格蘭球員，目前由碧咸嘅20球保持。

皇馬教練安察洛堤賽後表示：「打和係一個好嘅結果，呢場比賽好難踢，我認為對手表現都好出色。今場唯一唔好嘅地方，係畀對手射入一個世界波，我好滿意球隊表現，冇可能一直贏波，你哋(記者)想我話好嬲好失望？唔係咁樣，我好滿意。」