利物浦小將再外借 下一站侯城
外借RB萊比錫半季後收回嘅利物浦小將法比奧卡華路，嚟緊下半季將會再度外借，目的地係英冠侯城，幫球隊爭升班，為期半年。
《The Athletic》報道，該21歲葡萄牙中場吸引多支低組別球隊興趣，侯城同修咸頓都想簽佢，由於侯城今季已借用利物浦另一小將莫頓，喺莫頓積極拉攏底下，法比奧卡華路好大機會選擇加盟侯城。
報道稱，侯城同修咸頓開出條件相近，因此選擇邊隊就交由法比奧卡華路自己決定，預計交易會喺本周完成。
法比奧卡華路喺富咸出道，首季上陣6場入1球，然後隨球隊降班英冠，上陣38場入11球，上季轉投利物浦，上陣21場入3球，今季上半季外借到RB萊比錫，上陣15場0入球0助攻，今個冬窗返回利物浦，下半季將再度外借。