阿仙奴行「溫馨政策」　球員可帶家人去杜拜集訓

阿仙奴喺英足盃出局之後，要等到1月20日晚上先至再有賽事，出戰英超主場對水晶宮，兵工廠主帥阿迪達趁空檔，拉大隊去天氣溫暖嘅杜拜集訓，並採取「溫馨政策」，容許球員帶家人同行，希望用「愛」令球員建立正面情緒。

阿仙奴遭受3連敗，唔止英足盃出局，英超亦已落後榜首利物浦5分，領隊阿迪達早前表示，球員需要獲得更多愛，可助兵工廠重回正軌。呢位西班牙少帥果然言行一致，今次杜拜之旅集訓，邀請球員家人同行。由於倫敦天氣寒冷，阿仙奴今次選擇去杜拜集訓，希望球員喺舒適環境之下練波，可以盡快提升狀態，亦有渡假意味，畀佢哋稍為放鬆心情休息「充電」，加上仲有家人陪伴，效果更佳。

據悉阿仙奴今次會喺杜拜停留6日，然後返倫敦備戰對水晶宮。